الله يجازيك يا عم عبدالناصر .. جديد عبد الرحمن الأبنودى

:
البربر والهمج همه اللى بيخلوا الكلام دا يطلع
:
الله يجازيك يا عم عبدالناصر
بقـلم : الشاعر الكبيرعبدالرحمن الأبنودي
:
:
الله يجازيك يا عم عبدالناصر
الليل مليّل والألم عاصر
لسه اللي بيبيع أمته كسبان
وكل يوم أطلع أنا الخاسر
:
أما انت خميت مصر دي خمة
يوم ما ناديت بالعشق للأمة
ورطتنا نعشق خريطة عبيطة
وبشر ما نعرفهاش
وبلاد.. ما بنزورهاش
إلا.. فواعلية وبنايين
وسواقين وخدامين..
وطباخين.. وكناسين
بلاد أسافرها سعيد
ارجع حزين
:
حبيتها زي ما قلت لي.. واكتر
ع الأجنبي ما استكترتش عليا تستكتر
ع الأجنبي ما اتنقورتْش عليا تتنقور.
تطمع في دمعي
وف تعاسة راتبي.
مُلهم أنا.. واعمل غبي
:
وادي الألم يا عم عبدالناصر
زاحف وبيحاصر
وآدي الجميع خاسر
وآدي فجر أمتنا الجميل مغلوب
وآدي انتحار الأمة بالمقلوب
وأنا... غريب الدار..لابسني توب العار
ساكن في وطني بالإيجار
:
قاعد أنا ع الجسر في القيَّالة
من قلب اللهيب مِنشالة
وقلبي.. ساقية حزن سَيالة
باغني..ما اعرف مغني والاّ عديد
زي افتكار الميتين.. في العيد.
:
باعاني وحداني
شياطيني لابساني
والأمة قدامي.. مفارقاني
يا رب...ما تحببني في الناس الملاح تاني
يا رب ما ترجعني أعشق ضحكة اخواني
يا رب كرهني في أوطاني
:
ما أخيبك أمَّة ما أتعسك أمة
لا عقل... ولا همة...
لا مصدقه فعلك ولا تحفظي كلمة.أمة..
تدور وتلف..تقيلة.. مش حتخف
حماسية... وحماسها بكتيرُه ساعة.. يجف.
أمة بتتخابِط أمة بتتعابط
أمة ومالهاش لا زابط
ولا رابط
ولا كبير عيلة ولا قرابةْ دم وفكرة وهمية
ما تورث إلاّ الهمّ...
ما تحل عني يا عم..
:
إحنا ورثنا كلام إحنا تاريخنا كلام
علشان كده لما تقول..
علي طول أقول:وبكام؟؟
ما هو حب؟؟ دبرني
وتاريخ؟.. فكرني
وطريق؟.. نورني
ومصير؟.. بصرني
ده انا بقيت عربي
من قبل ما القي اللي يمصرني.
أنا انتمائي لأمتي...ممسخرني.
محسوبة في الأحزان
عليّ في الفرح تنكرني
:
ياللي انتي لا أمة ولا انتي أم..
فيه أم ما تعرفش ساعة الألم..تضم؟..
قد ما ننورها هيه مضلمة
قد ما نعلمها..مش متعلمة.
كل ليلة بايتة مظلومة
وهيه الظالمة!!
آخرة السكك الوعارمجد..
متلطخ.. بعار.
قد ما نحجمها...تفلت م الإطار!!
السلاح من صنع بره
والكلام من صنع بره
المآكل الملابس والهوا البارد في بيتي..صنع بره.
لا نسجْت الهدمة..لا زرعْت.. ولا اكتفيت
شفتها.. جريت اشتريت.
جلاّبيتي.. عمامتي.. سجادتي
وحواديت الصغاروالحلاوة: حلوة.. مرة
شغل بره.
إيه يهم
إن مت من أجل البشر
ولا سبت الديب يصرَّخ واتغابيت؟...
أو نسيتها؟ أو اتناسيت؟؟..
الشهادة مجانية...
والبطولات...نفحات استعراضية
:
والليل مليّل والألم... عاصر
لسه اللي بيبيع أمته كسبان..
وكل يوم..أطلع أنا الخاسر...
الله يجازيك يا عم عبدالناصر!!

هناك 35 تعليقًا:

الأحــــــ إيناس ــــــزان يقول...

بسم الله وناخد أول تعليق

الأحــــــ إيناس ــــــزان يقول...

كوووووول سنة وحضرتك طيب عيد سعيد عليك وعلى الامة الاسلامية جمعاء

الأحــــــ إيناس ــــــزان يقول...

ماشاء الله جميله اوووووووووووووى
احيك على النقل المميز ربنا يسعدك

دمت ودام لنا قلمك الرائع

مودتى
ايناس

الزنارى يقول...

راجل محترم فعلا
عبد الناصر
يا رب نجد شخص مثلة الان
و القصيد فعلا رائعة
مع تحياتى و تقديرى
أحمد الزنارى

ريتاج يقول...

يسعد مساك

كل سنة وحضرتك طيب عيد سعيد عليك ويتعاد عليك الايام بالخير

تسلم يدايك على النقل الاكتر من رائع

تحياتى
ريتاج

رضا الكومى يقول...

نورتى يا إيناس
وكوووووووووول سنة وانتِ طيبة
وعيد سعييييييييد عليكِ إن شاء الله

رضا الكومى يقول...

الزنارى
فعلاً عبد الناصر كان سابق عصره
حاول لم العرب ونجح بقدر كبير
لكنه تفرقوا بعد وفاته كأنهم كانوا خايفين منه
ونورتنى يا أحمد باشا

رضا الكومى يقول...

ريتاج

وانتِ طيبة وبخير
سعدت بتعليقك

تقبلى مودتى

عاشق الجنة من الإخوان صلى على النبى يقول...

اييييييييييييييييييه
ر بنا يجازيه بقي
كل عام وأنتم وإلي الله أقرب وعلي طاعته أدوم
كل عام وأنتم بخير
في ا نتظار زيارتك عشان تنور مدونتي
صلي علي النبي

Mona يقول...

أنا لن أعلق بس حبيت أقول لك أنى متبعاك وحين لا أعلق لا يعنى أننى لم أقرأ - وكل سنة وأنت طيب ويارب يكون كان عيد سعيد عليك يارب

يا مراكبي يقول...

لا علاقة لما حدث بعبدالناصر وحلم القومية العربية .. فالقائمين على الأمور بين هنا وهناك وما بينهم هم اناس آخرين في عصر مختلف بمصالح مختلفة ورؤى مغايرة لا يهمها الإتحاد ولا العروبة ولا حتى الوطنية المحلية .. يا عزيزي دعك من كل هذه الظواهر التي ظهرت على السطح وأفرد لها الكثيرون العديد من التحليلات .. وفتش فقط عن البيزنس والمال .. فهو من يتحدث ويحرك ولو من وراء ستار

غير معرف يقول...
أزال أحد مشرفي المدونة هذا التعليق.
رضا الكومى يقول...

منى

أنا عارف إن الموضوع ده مسببلك حيرة
علشان كده محبتيش تعلقى على شعر عبد الرحمن الأبنودى

رضا الكومى يقول...

يا مراكبى

أختلف معك فى حلم القومية العربية فعبد الناصر هو من أحياه وتزعمه

وأتفق معك فى أن أيدى خفية تحرك موضوع الفرقة بين الأمة العربية

ولكن ألا تتفق معى أن ما حدث من بلد المفروض أنه شقيق هو صفعة قوية تستدعى الرد وخاصة أن ما حدث لا علاقة له بمبارة ولكنه أظهر أحقاد دفينة ليس لها سبب

رضا الكومى يقول...

غير معروف

إذا كان بينك وبين شخص مشكلة فأرجو ألا تجعل من مدونتى مكان لها
أنا اضطررت لحذف التعليق حتى لا نغضب طرف آخر
ثم إن الروابط التى وضعتها غير صحيحة

يا مراكبي يقول...

حلم القومية العربية لم يكن حلما بريئا هكذا على إطلاقه دون وجود مصالح خلفه .. وأنا أحب هذا الحلم للعلم وأتمنى إحياؤه ونجاحه .. ولكن ليس هذا هو موضوعنا

أعود للصفعة الجزائرية لنا .. الأحقاد الدفينة ليست جزائرية فقط بل هي لدى أغلب العرب .. وهي ذات أسباب متعدده لابد أن نعترف بها وألا نغرق في تضخيم ذاتنا كأننا ملائكة لم ولا نخطئ

راجع اللينكات التالية ثم استجمع أفكارك وستعرف ماذا أقصد

الغضب الجزائري من بيع شركات الأسمنت للأجانب
http://www.elbashayer.com/?page=viewn&nid=60452

ونفس الموضوع متعلق بشركة المحمول
http://www.echoroukonline.com/ara/economie/44715-856.html

أنباء عن خلاف إقتصادي بين الرؤساء
http://www.saveegyptfront.org/news/?c=170&a=25519

بوست لمدون زميل عن أسباب الحقد الدفين
http://almicrobus.blogspot.com/2009/11/blog-post_19.html

إبراهيم عيسى يسأل: هل مصر فعلا صاحبة فضل على العرب؟
http://dostor.org/ar/index.php?option=com_content&task=view&id=39425&Itemid=64


خالص تحياتي

أبو العريف يقول...

ezyak ya basha

ma3lesh el keyboard mesh 3awez yekteb 3arabi

ana gay h2olak eny katabt el post
bta3 elmatch bs men agl el hezar

aw kont 3ayez a5arag el nas men el 7alah

elly homa feha

,enna aktar sha3b byed7ak 3la
homomoh

Dr Ibrahim يقول...

تقبل الله منا ومنكم صالح الأعمال
كل عام وأنتم بخير

الوحدة العربية مطلوبة ولكن بعيداً عن المصالح وعن النفوس الضعيفة والأحقاد الدفينة..

تحياتى لك

رضا الكومى يقول...

يا مراكبى

أشكرك لتفاعلك

وقد اطلعت على بعض الروابط

لكن أصحابها لا يقفون على أرض ثابتة

لك كل الود

رضا الكومى يقول...

أبو العريف

إيه يا عم الدنيا مقلوبة عندك كدا ليه ؟
الله يكون فى عونك

البوست بتاع الماتش فعلاً دمه خفيف
لكن كنا عايزين نهاية سعيدة !!!

رضا الكومى يقول...

يا دكتور إبراهيم

طول ما فيه أحقاد دفينة
انس الوحدة


كل سنة وانت طيب

Tamer Nabil يقول...

اختيار رائع

رغم ان عبد الناصر كان لية عيوب بس مميزاتة كتير وكان رجل بمعنى الكلمة ربنا يرحمة


مع خالص تحياتى

Atef Shahin يقول...

الاخ رضا
المشكلة ان كل شئ تغير فلم تعد المبادئ هي المبادئ ولا الاخلاقيات هي الاخلاقيات ..حتى الجمهور انظر الى مباريات الاهلي والزمالك القديمة سترى الجمهور مختلطا بلا حواجز ولا يمكن ان تسمع شتيمة واحدة
المهم .. تحياتي وشكرا على نشر القصيدة

Tamer Nabil يقول...

السلام عليكم


ازيك رضا اخبارك اية

فى انتظار جديدك


مع خالص تحياتى

Dr Ibrahim يقول...

أستاذ رضا
كنت تتمنى ان يكون كتاب يوميات نص الليل لدكتور مصطفى محمود على الإنترنت
"يا سلام لو كان موجود على النت !!!!!"
وها هو حمله من هنا

قراءة ممتعة

رضا الكومى يقول...

دكتور إبراهيم

الله يجازيك كل خير
أشكر لك اهتمامك
وانك لسة فاكر أمنيتى
مع إن الرابط لم يعمل ، لكن أنا سعيد باهتمامك
ولو فيها رزالة تنسخ لى الرابط فقط
وشكراً مرة أخرى

رضا الكومى يقول...

أ/ عاطف شاهين
يبدو أننا مازلنا لا نفهم الآخرين ولا طريقة تفكيرهم

سعدت بوجودك جداً

رضا الكومى يقول...

تامر

عليكم السلام ورحمة الله وبركاته

شكراً لسؤالك

وإن شاء الله يدوم التواصل

الشاعر الفنان أحمد فتحى فؤاد يقول...

الأستاذ رضا
قصيدة ممتازة للأبنودى
هو شاعر عظيم و فنان و لا أجمل
ربنا يمد فى عمره و يرحم عبد الناصرو يغفر له و يغفر لنا جميعا .. أمين
شكرا لزيارتك
و أتمنى دائما أشوفك
شكرا

Sharm يقول...

اللللللللللللللله

Dr Ibrahim يقول...

ازاى يافندم جرب تانى
الرابط يعمل ولسه منزله حالاً لأتأكد مرة أخرى...فقط عندما تفتح الصفحة
أضغط Click here to start download..

وسيحمل على الجهاز

سارة يقول...

سلام عليكم
محتاجه رايك كاخ اكبر ياريت تساعدنى
http://3aady.blogspot.com/

إبتسامة ملاك يقول...

السلام عليكم

كل عام وانت الى الله اقرب

فينك
وفين جديدك

ابقا طمنى عليك
ايناس

رضا الكومى يقول...

تمام يا دكتور إبراهيم
يبدو أن الخطأ من عندى - النت كان ضعيف يمكن
وبدأت حالياً أستمتع بقراءته
جزاك الله خيراً

(حلـم)،، يقول...

اخي رضا


ازيك انشالله بخير


انت والاهل وفي احسن حال



طابت اوقاتك بصحبة الاوفياء


خبيت اطمن


اخوك حلم